सरकारलाई दबाब दिन दैशैभरिका मिटरब्याजी पीडितले काठमाण्डौ आउने तयारी गरेका छन् । काठमाण्डौ आएर धर्नामा बसेका केही मिटरब्याजीको समस्या समाधानका लागि सरकारले कार्यदल गठन गरे पनि न्याय पाउने सम्भावना कम रहेको भन्दै देशैभरका पीडित काठमाण्डौ आउने तयारी गरेका हुन् ।
पीडितले मिटरब्याज असुलीमा संलग्नलाई कारबाही गर्ने कुरा लिखितमा नभइ मौखिकमा मात्र आएकाले विश्वास गर्ने कुनै आधार नभएको बताएका छन् । सरकारको निर्णयपछि दबाब दिन देशैभरिका पीडितलाई माइतीघर बोलाएको नवलपरासीका मिटरब्याजी पीडित जितबहादुर थापा मगरले बताउनुभयो । थापाका अनुसार कैलाली र दाङबाट आज बिहीवार राति मिटरब्याजी पीडित काठमाण्डौ आउँदैछन् । भोलि शुक्रवार कपिलवस्तु र त्यसैगरी पूर्वी जिल्लाबाट पनि पीडित काठमाण्डौ आउन लागेको उहाँले बताउनुभयो ।
गएको शुक्रवार नवलपरासीका मिटरब्याजी पीडितलाई न्याय दिन र दोषीलाई कारबाही गर्न गठन भएको ६ सदस्यीय कार्यदलले मिटरब्याजको अनुसन्धान गरी प्रतिवेदन बुझाउन कम्तीमा एक महिना लाग्ने भनेपछि मिटरब्याजी पीडित सरकारसँग असन्तुष्ट भएका छन् । पीडितले तत्काल न्याय पाउनुपर्ने माग गरेका छन् । तर कार्यदलका संयोजक एवम् गृह मन्त्रालयका सहसचिव डाक्टर भीष्मकुमार भुसासले यो समस्याको देशव्यापी रूपमै अन्त्य गर्न अझ बढी समय लाग्न सक्ने बताउनुभएको छ । यो देशैभरिको समस्या भएको र सबैको समस्याको समाधान एकैचोटि गर्नुपर्ने उहाँले बताउनुभयाे ।
यसअघि गएको जेठ २९ गते धर्ना दिन आएका पीडितलाई न्याय दिलाउने र दोषीलाई कारबाही गर्ने सम्झौता भएपछि उनीहरू घर फर्किएका थिए । तर समस्या समाधान भएन । काठमाण्डौको माइतीघरमा न्याय माग्दै धर्ना दिएका नवलपरासीका मिटरब्याजी पीडितले न्याय नपाइ गाउँ नफर्किने निधो गरेका छन् । उनीहरू धर्नामा बसेको आज १८ दिन भइसकेको छ ।
कमेन्ट गर्नुहोस !